نوحہ
اختر حسین جعفری
4 اپریل 1979
اب نہیں ہوتیں دعائیں مستجاب
اب کسی ابجد سے زندانِ ستم کھلتے نہیں
سبز سجادوں پہ بیٹھی بیبیوں نے
جس قدر حرفِ عبادت یاد تھے، پَو پھٹے تک اُنگلیوں پر گن لیے
اور دیکھا --- رحل کے نیچے لہو ہے
شیشئہ محفوظ کی مٹی ہے سُرخ
سطرِ مستحکم کے اندر بست و در باقی نہیں
یا الٰہی مرگِ یوسف کی خبر سچی نہ ہو
ایلچی کیسے بلادِ مصر سے
سوئے کنعاں آئے ہیں
اک جلوسِ بے تماشا گلیوں بازاروں میں ہے
تعزیہ بر دوش انبوہِ ہوا
روزنوں میں سر برہنہ مائیں جس سے مانگتی ہیں ھنّتوں کا اجر
خوابوں کی زکوٰۃ
سبز سجادوں پہ بیٹھی بیبیو
اب کسی ابجد سے زندانِ ستم کُھلتے نہیں
اب سمیٹو مشک و عنبر، ڈھانپ دو لوح و قلم
اشک پونچھو اور ردائیں نوکِ پا تک کھینچ لو
کَچی آنکھوں سے جنازے دیکھنا اچھا نہیں
No comments:
Post a Comment